Hvernig er hægt að skulda 45 milljarða?

Hannes Smárason skuldar jafn mikið og það kostar ríkið að borga atvinnuleysisbætur í tvö ár miðað við núverandi ástand á vinnumarkaðinum eða um 45 milljarða. Dæmi Hannesar er ekki einsdæmi,heldur eitt af mörgum.

Spurningin er sú hvernig það hafi gerst að einn einstaklingur getur skuldað upphæð sem nemur miljörðum. Kannski segir þessi tala allt það sem segja þarf um það brjálaða ástand sem hér hefur ríkt. Sumir virðast hafa getað gegnið sjálfala um í bönkum landsins og fengið lán út á veð en gátu aldrei borgað vexti og afborganir af lánunum. 

Matador er spil þar sem maður getur leikið sér að því að kaupa og selja plasthús, plastbíla með plat peningum. Það þarf að sjá til þess að í framtíðinni verði tryggt að menn getir ekki spilað í fjárhættuspilum með hús fjölskyldanna í landinu, bílana þeirra og líf. Þeim verði gert að spila Matador, þar sem allt er í plati.

Það á ekki að bjóða þjóðinni upp á það að borga sukkið eins og útlit er fyrir að við þurfum að gera. Við höfum ekki val, við verðum skikkuð til þess með skattahækkunum eða þjónustugjöldum sem kemur til með að leiða til verri lífskjara með einum eða öðrum hætti.

Það á að byrja á sykurskattinum sem kemur til með að hækka afborgarnir verðtryggðra lána venjulegs fólks sem bara á að borga og borga. Útrásarvíkingarnir með riddarakrossana sleppa eða fá lúxusvist á Kvíabryggju.

Kveðja,
Grétar Mar

Athugasemdir

[Árni Gunnarsson, 18.5.2009 kl. 20:36]

Skuldir þessa mannfjanda gætu nú einfaldlega verið kápa til að breiða yfir stærri fjárfúlgur sem honum hefur tekist að koma snyrtilega fyrir á öruggum stað.

Gamlir reyfarar fyrir börn sögðu frá leit að fólgnum fjársjóðum sjóræningja á afskekktum eyjum eða ólíklegum stöðum og korti sem einhver stálheppinn maður fann og vísaði honum leiðina að fjársjóðnum. Í dag eru rannsóknarnefndir á vegum ríkisins að leita að svona kortum sem flest eru í smápörtum og þarf að setja saman af mikilli nákvæmni og kúnst sem líkega þeir einir kunna til hlítar sem bjuggu svipuð kort til sjálfir.

Á tölvuöld læra börn tungumál og galdra tölvunnar ótrúlega ung. Dæmi eru um að ungmenni um - eða innan við fermingu nái slíkum tökum á þessu galdratæki að þeim hafi tekist að vinna þar spellvirki af prakkaraskap sem tók færustu sérfræðinga langan tíma að leysa. Nú legg ég það til að þessari rannsókn á undanskotum fjármuna verði hraðað með því að efna til verðlaunakeppni meðal grunnskólabarna. Börnunum verði fengin þau gögn sem tiltæk eru hjá viðkomandi fjármálastofnunum og tölvum úr eigu grunaðra. Síðan verði þeim gefnar þær upplýsingar aðrar sem að gagni mættu verða og háum verðlaunum heitið ef árangur næst og milljarðarnir finnast.

Svo gæti þetta verið upplegg til efnis í spennusögu fyrir unglinga sem gæti orðið metsölubók á borð við Harry Potter ef vel væri haldið á af höfundi!!!!! 

[Grétar Mar Jónsson, 19.5.2009 kl. 09:50]

Sæll Árni
Þetta er góð hugmynd að láta börnin  hafa það sem verkefni í grunnskólum landsins að leita að týndum fjársjóðum. Það mætti einnig tengja það við siðferðis nám.