Hallir eða velferð?

Það sér nú ekki fyrir endann á þessari endemis vitleysu sem bygging tónlistar- og ráðstefnuhúss í Reykjavík er að verða.

Þjóðin er það illa stödd fjárhagslega að það er verið að skera niður framlög til heilbrigðis- mennta- og félagsmála. Það er verið að leggja auknar skattbyrðar á heimilin. En samt er haldið áfram að reisa höll. Höll sem reynt er að troða á nafnið, Alþýðuhöll.

Það á ekki að líða það hér á landi að á sama tíma og þjóðin býr við gjaldeyrishöft og minni þjóðarframleiðslu sé verið að forgangsraða á þennan máta.

Það eru höft í dag á inniflutningi á lúxusvörum en á sama tíma er verið að flytja inn gler og verkamenn frá Kína.

Það er mín skoðun að það eigi að fresta byggingu þessarar hallar og nota þá 5-6 milljarða sem sparast við það á ári til að byggja upp og stuðla að uppbyggingu í atvinnumálum.

Þjóðin á auðlindir sem eru til þess fallnar að gefa henni möguleika á að komast í gegnum þessa kreppu. Hún á og þarf að nýta þær með þeim hætti að þær leiði til atvinnusköpunar sem auka þjóðartekjur og ekki síst gjaldeyristekjur. Hvort heldur það er til aukningar á gjaldeyristekjum eða sem leið til að spara gjaldeyri. 

Sem dæmi vil ég sjá að reist verði áburðarverkssmiðja til að framleiða áburð fyrir innanlandsmarkað, átak verði gert í tengslum við ferðamannaiðnað og horft verði til nýsköpunar í tengslum við sjávarútveg og landbúnað. 

Við þurfum að stuðla að því að peningar sem lagðir eru í atvinnuvegi sé til þess fallnir að auka þjóðar- og gjaldeyristekjur.

Við getum með sameiginlegu átaki komist í gegnum þessa kreppu ef skynsamlega er haldið á málum. En það er engin skynsemi í því að halda byggingu þessarar hallar áfram.

Eigið góðan dag,
Grétar Mar

 

 

 

Uppsetning á glerhjúpnum hafin